Рўзиқул Бердиев: "Чемпионатда ҳеч қандай мақсад қолмаган"

Суперлиганинг 25-тури доирасида "Нефтчи" майдонидаги мағлубиятдан кейин "Насаф" бош мураббийи Рўзиқул Бердиев матбуот анжуманида қатнашди.

- Қизил карточкага қадар барчаси режа асосида кетаётганди. Шундан кейин кўп нарса ўзгариб кетди. Бу орқали ташаббус майдон эгаларига ўтиб кетди. Улар вазиятларидан унумли фойдаланди. Иккинчи бўлим бошидаги хатодан кейин "Нефтчи"нинг мақсади енгиллашди. Бир киши кам бўлиб 80 дақиқа ўйнаш исталган жамоа учун оғирлик қилади. Шунга қарамай биз қаршилик кўрсатишга ҳаракат қилдик. Қарши ҳужумларда ўз вазиятларимизни кутдик, лекин буларни голга айлантира олмадик. Рақибларни ғалаба билан табриклайман. Мавсум якуни бўлишига қарамасдан иккала жамоа ҳам яхши ўйин кўрсатди деб ўйлайман.

- Яқинда Самвел Бабаян ўз интервьюсида агарда "Навбаҳор"да ишлаганимда "Насаф"га чемпионликни осонликча бермасдим, деб айтди ёки чемпион бўлганида ҳам осонликча қўлга киритмасди деб таъкидлади. Самвел Бабаяннинг гапларига қандай реакция қилдингиз?

- Тўғриси, бу гапларни эшитмадим. Сиздан эшитяпман. Бу гапларни муҳокама қилмоқчи эмасман. Менимча "Навбаҳор" биринчи даврадагидан кўра, ҳозирги мураббий билан яхшироқ футбол ўйнаяпти. У Кубок финалига жамоани олиб чиқди, руҳан қийин ҳолатда жамоада ишлади. Эски мураббийлар кетган вақтида "Навбаҳор" пастроқда эди.

- Чемпионлик билан табриклайман. Миллий терма жамоага бош мураббий бўлсангиз, "Насаф"га ўхшаган жамоа туза оласизми?

- Бугунги ўйиндан анча четга чиқиб кетяпмиз. Аввалига Самвел Бабаян, энди терма жамоа. Миллий жамоамиз яхши натижа кўрсатмоқда. Бу таркиб билан термамиз жаҳон чемпионатига чиқади. Бунга ишонаман. Мураббий сифатида мен учун клубда ишлаш осонроқ. Чунки ҳар кун футболчилар билан бўласиз ва қарашларингизни сингдиришингиз осон. Бу муҳокама қилинмайди, терма жамоа ҳақида гаплашмоқчи эмасман. Ҳозир термага бориб, бундай жамоа тузишга қурбим ҳам етмайди. Термамизга ишонаман, уларни доим қўллаб-қувватлаймиз. Яхши ўйин кўрсатишяпти. Ҳозирги ҳолат ҳам ёмон эмас. Барчаси ўз қўлимизда. Кечирасизлар, терма жамоа ва Самвел Бабаян ҳақида гаплашмайлик. Иштиёқ ҳақида гапирдингиз. Суперкубокни қўлга киритдик. Чемпионликка катта мақсад қўйдик. Асосий эътиборимиз шу эди. Масалан, учта кубокни олиб, ОЧЛда гуруҳдан чиқа олмасак ҳам ҳеч ким бизга ҳеч нима демасди. Чунки мақсад чемпионлик бўлганди. Чемпион бўлгандан кейин футболчида пасайиш бўлади. Бу табиий ҳолат. Ҳамма соҳада бор бу. Ундан ташқари, бугунги ўйинда биз айрим футболчиларга ҳа имконият бердик. Хурсандмиз, кимларгадир имконият, тажриба беряпмиз. Бу ўйинга ҳам жиддий тайёргарлик кўргандик ва таркибни ҳам аниқлаб олгандик. 

- Таркибда 2004-2005 йилда туғилган футболчиларнинг борлиги бизни қувонтиради. "Насаф"да ҳали кашф қилиниши керак бўлган футболчилар борми? Ёш иқтидорлар "Насаф"да қоладими ёки каттароқ жамоаларга бериб юбориладими?

- Ҳали "Металлург" билан ўйинмиз бор. Ўша учрашувда ҳам ёшларга имконият берамиз. Лекин 27 ноябрь кунги ўйинга жиддий ёндашамиз. Кичик имконият учун ҳам курашамиз. Чемпионат ўйинларида бизга ҳеч нима керак эмас. Бундай пайтда кимларнидир кўриб олишимиз керак бўлади.

- "Насаф"га келган легионерлар қанчалик ўзини оқлади? Келаси йили таркибда янгилар бўладими?

- Легионерлар орқали ички рақобатни кучайтиришимиз керак эди. Ўтган сафар айтгандим, легионернинг олиб келиниши қайсидир маҳаллий футболчига таъсир қилади. Биз асосий  мақсадимизга эришдик. Энди қайсидир футболчиларга раҳмат айтамиз. Ўзгаришлар бўлиши эса аниқ. Чунки клуб режаларида келаси йили ҳам яхши жамоа шакллантириш бор.

- Сизнингча чемпионат қандай ўтди?

- Чемпионатимизда яхши жамоалар кўпроқ бўлди. Ўртадаги жамоаларни олсангиз "Динамо" ёки "Сурхон" жамоалари ҳам пешқадамларга муаммолар туғдирди. Турнир жадвалининг пастки ўринларидаги жамоалар билан ўйинда очко йўқотган пайтларимиз ҳам бўлди. Бу эса жамоалар кучаяётганидан далолат. Олдинлари тушиб кетадиган ва етакчи жамоалар тезда ажралиб қоларди. Лекин ҳозир 2-ўрин учун 5та жамоа даъвогарлик қилди. Тушиб кетмаслик учун ҳам 4та жамоа курашмоқда. Бу эса рақобатбардош жамоаларнинг кўпайгани ва чемпионатимиз савияси ошганидан далолат. Бу менинг фикрим.

Манба : championat.asia